MAHNI KRAWS PU-A ISUA ZUI
LUKA 9:23-24
Tin, amah vêkin mi zawng zawng hnênah, “Tu pawhin mi zui a duh chuan, mahni hrehawm pawisa lovin, ni tin a kraws puin mi zui rawh se. Tu pawh a nun humhim duh apiangin a chân ang a; tu pawh keimah avânga a nun chân apiangin, chu mi ngei chuan a humhim ang.
He thu hi Matthaia leh Marka pawhin an ziak ve a. Hengte aia Luka ziak a duhawm deuh zâwkna chu ‘ni tin’ tih a ziak tel kher bîk hi a ni. ‘Mahni hrehawm pawisa lovin’ tih hi ‘mahni inphatin’, ‘mahni aia Lal Isua duh dân ngai pawimawhin’ tihna a ni, an ti a. Kan put tûr hi Lal Isua kraws ni lovin mahni kraws a ni tûr a ni bawk.
Lal Isua kan zuina kawngah hian zahna te, mualphona te, chânna te, tawrhna te, retheihna te, sual kalsan tûr te leh thil tam tak hmachhawn tûr a awm ṭhin a. Mahni inhre chang lova Lal Isua duh dân dah lal zâwk zêla kan zui hian mahni kraws ni tin kan pu a lo ni ṭhin. Tirhkoh Paula’n ‘ni tin ka thi ṭhin’ a tihte nên pawh khan a inzûl âwm e (1 Kor. 15:31).
