MIHRING

GENESIS 1:27
Pathian chuan amah angin mihring, mipa leh hmeichhia a siam a, Pathian anpui ngeiin a siam a ni.

Charles Darwin-a chuan mihring hi zâwng lian chi (ape) thlah kan niin a sawi a. A thih dâwnah phei chuan a inchhîr ve hlê niin an sawi. ‘Pathian anpui’ tih hian pian hmang lama anna lam ai mahin ‘hriatna, felna leh thianghlimna lama anna’ leh ‘thlarau neia siam’ a nihna hi a kâwk zâwk mah mai thei. Kohhran puipa hmasate pawhin mihringin Pathian a anna chu a ngaihtuah theihna te, duhthlan theihna zalên a neih te leh thlarau thih theih lohna a neih te hi niin an sawi ve bawk.

Sam 8:1-9-ah hian mihring chu Pathian aia hnuai deuh chauhva siam a nih thu leh thilsiam dangte chunga thuneituah siam a nih thu kan hmu a. Mihring chauh hi a thil siamte zînga a kawm theih leh thlarau neia a siam a ni a. Hei hi thil siam dangte aia a chungnunna leh a danglam bîkna a ni.