ISUA LEH UIRE NU

JOHANA 8:10-11
Tin, Isua chu a tho va, a hnênah, “Hmeichhia, khawiah nge an awm tâk? Tu mân thiam loh an chantîr na che nge?” a ti a. Tin, ani chuan, “Lalpa, tu mân mi chantîr lo ve,” a ti a. Tin, Isuan, “Kei pawhin thiam loh ka chantîr lo va che; kal la, tûn hnuah tisual leh tawh suh,” a ti a.

Mosia dânah uirê chu lunga den hlum tûr a ni a. He nu pawh hi Isuan engtin nge a tih hriat duhin a hnênah an rawn hruai a ni. Fing takin, “In zînga sualna nei lo apiangin amah chu lungin dêng hmasa rawh se,” a lo ti a; sual nei vek an nih ve tho avangin an ṭin zo ta mai a. A tâwpah chuan Isuan tisual leh tawh lo tûrin a thlah ta a ni.

Kan Lalpa hi mi sual sim ngaidam duhtu a ni tih a va chiang êm! Tualthahna thilah te, uirê-na sualah te, hlêprûkna bawlhhlawhah leh thil sual chi hrang hrangah i lo inhnamhnawih a nih pawhin i sual i sim chuan Lal Isuan a ngaidam ang che. Mi felte lam tûra a lo kal leh hmâ hi chuan mi sualten a thinlungah hmun an chang thûk êm êm a ni. Simin i pan ve dâwn em?