THU NUNG

ROM 15:4
Lehkha Thua lo ziak tawh rêng rêng chu min zirtîr tûra ziak a ni, thu ziak aṭanga chhelna leh thlamuanna kan dawn azâra beiseina kan neih theih nân.

HEBRAI 4:12 – ‘Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.’

1 PETERA 1:23 – ‘Chi chhe thei lakah ni lovin, chi chhe thei lo Pathian chatuan thu nung laka piangthar in nih kha.’

Pathian thu thiltithei tak hian kan nun hi engtiangin nge a lo tih danglam ve tawh ang le!

George Mueller, rinna nasa tak a neih avânga mi hriat hlawh tak chuan, “Bible ka hriat tirh kum 3 chhûng kha chu ka en liam ve mai a, Pathian thu tak tak kha ka hnâwl a ni. Mahse taima taka ka han zir tâk hnu kha chuan a malsawmna mak tak ka dawng a. Vawi 100 lai uluk leh taima zâwkin ka chhiar a, ka zir bawk a ni!” a ti.

‘Kristian Vanram kawng zawh’ lehkhabu ziaktu, John Bunyan-a chuan, “Bible hi chhiar ula, chhiar nawn fo ula, in hriatthiam loh a awm pawhin midangte râwn hreh lo ula. Nangmah leh nangmah inti hnual lo la, a hrilhfiahna bu i neih loh pawhin beidawng suh ang che. Ṭawngṭai chungin chhiar la, chhiar chungin ṭawngṭai bawk ang che. Mihring ngaihtuahna aiin Pathian a ropui zâwk a ni tih hre reng ang che u.” a ti.

Pathian leh Bible tel lovin he khawvêlah fel takin ro a rêl theih ngai lo vang. – George Washington