PATHIAN FINNA

JOBA 37:5
Pathian chuan mak takin khawpui a tiri a, Thil ropui tak, kan hriatthiam phâk loh a ti a ni.

Hla phuahtu chuan, “Pathian thil rêl dan hi, a va mak em. Hriat phâk rual loh a ni; a tum zau zia; Thil tê ber pawh a vêng, Van thil a rêl kim e, Pathian ruat ang zêlin engkim a thleng” a ti.

Kan duh anga thil a kal loh leh kan tum anga kan awm loh hian mihringten Pathian thil rêl dân leh remruatnaah lungawi lohna emaw vuina emaw duhthusam lohna kan nei ṭhin. Mahse Pathian chuan engkim a rêl fel vek a, a tum dâl rual a ni lo.

Sakhaw miril tawh tak hi ni khat chu Theihai kûng hnuaiah nî a sat avangin a ṭhu châwl a. A bula mâi hnah zâm vêl te leh a rah lian tak mai chu a en reng a. A rilru chuan, “Pathian hi a va han â tak em! Mai rah lian leh rit tak chu zâr nei lo leh kûng nei lo-ah a rah tîr a. Leiah an bawk hniang hnuang a. Chutihrualin theihai rah tereuhte te erawh kûng lian taka a dah leh lawi bawk si a. Pathian chu ni ila, hei ai hi chuan ka rêl fel deuh ang maw le” a ti neuh neuh a.

Chutia a tih lai chuan thli na tak a rawn thaw a, Theihai kûng chu a kûr lâwp lâwp a, a rah chuan a hnârah tak chuan a rawn tlâk a, na a ti êm êm mai a. Chu theihai rah chu lian deuh phei se chu amah chu a tlâk hlum loh pawhin a tlâk na viau ngei ang le.

Tichuan a rilru chuan Pathianin Mâi rah lian tak kha Theihai kûngah rah tîr ta zâwk se, a tlâk nat dan tûrte a ngaihtuah a. Pathian thil rêl dan chu a fak a, Pathian thilsiam dân leh remruatnaah inrawlh a tum tawh ngai lo a ni.

Pathianin khawvêl a siam dân hi a ropui êm êm a, thilsiam chi hrang hrang, thing leh mâu, tlâng leh phâi, lui te leh dîl te hi a nih tûr ang thlapin a siam a. Lei leh vân leh a chhûnga thil awm zawng zawngte hian Lalpa ropuizia an tarlang chiang hlê a ni.

JEREMIA 51:15
A thiltihtheihnain lei a siam a, A finnain khawvêl a din, A hriatnain vân a kai pharh ta.