UPATE KHAWVÊL

THUFINGTE 3:1-2
Ka fapa, ka dân chu theihnghilh suh la, I thinlungin ka thupêkte chu zâwm reng zâwk rawh se; Dam ni leh kum te, Thlamuanna te a pêk belhchhah dâwn che nia.

Kum upa tak takte hian ram tân leh he khawvêl tân hian thil ropui tak tak an lo ti tawh ṭhin a. Tûnlai khawvêl hi ṭhalaite khawvêl ti ṭhin mah ila, ṭhalaiten kum upate an tluk lohna leh Pathianin malsawmna leh finna leh thahrui chak zâwk tam tak a pêk hi kan hmuh hmaih ṭhin a ni.

Winston Churchil-a kha kum 81 mi a nihin Prime Minister a la ni a. Clara Barton kha kum 83 a nihin International Red Cross hotu lû ber a la ni a. Robert Frost-a khân kum 80 mi a nihin poem lâr tak tak a la phuah ṭhin a, Oliver Wendell Holmes pawh kha kum 90 mi a nihin Chief Justice a la ni fan fan bawk.

Connie Mack kha kum 88 mi a nihin baseball team champion Manager a la ni thei a. Arturo Toscanini kha kum 87 mi a nihin khawvêla zaipâwl lâr tak conductor a la ni thei bawk. Thuhriltu lâr John Wesley-a khân Pathian malsawmna dawngin kum 88 mi a nih pawhin thu a la sawi ṭhin a ni.

Chancellor Conrad Adenauer, German mi kha kum 90 mi a nihin hritlâng khawsik a nei a, a dâktawr chu a ko a, mahse a dam lawk thei si lo a, a dâktawr chungah chuan a thin a rim ta a. Dâktawr chuan, “Ka pu, magician ka ni lo a, naupang tak turin ka siam thei lo che a ni” a ti a. Chancellor chuan, “Naupang takin min siam leh rawh ka ti lo, upat zêl ka duh avângin dam hi ka mamawh a ni” tiin a chhâng.

Mi tam tak hrisêlna leh dam reina chhan pakhat chu an thuawihna vâng a ni kan ti thei ang, chu chu Pathian malsawm ropui tak a ni. Chutihlai chuan thianghlim lo leh bawlhhlawh taka nun kan hman chuan, kan hrisêl lo a, kan dam rei lo a; Pathian rawng pawh rei tak kan bâwl thei ṭhin lo a ni.

EPHESI 6:3
Chutichuan, i tân a ṭha ang a, leiah hian i dam rei bawk ang.