NIHLAWHNA THU 3-NA

MATTHAIA 5:5
Thuhnuairawlhte chu an eng a thâwl e; lei hi an la rochung dâwn si a.

Sam 37:11-ah chuan, “Thuhnuairawlhte erawh chuan ram hi an luah ang a…” tih kan hmu a. Lal Isua sawi nên hian a inzûl hlê. Thuhnuairawlh tih hi chiang taka hrilhfiah a har hle a, zaidam, ngilnei leh inngaitlâwm tihte hian a awmzia phawk zo lo mah se a zûl thui viau ang a. Lal Isua vêkin, “Biang lehlama bengtu che chu lehlam pawh dawh rawh; tin, i puan laksâktua hnenah chuan i kawr lâk pawh hnial suh …” (Lk.6:29-31) tia min zirtîrna hian a hrilhfiah mai awm e.

Hetiang mite chan tûra Lal Isuan min kawhhmuh chu ‘lei hi an la rochung dâwn si a’ tih a ni a. Bible lehlin tharah chuan ‘ram chu an la rochung dâwn si a’ tih a ni. Engpawh ni sela, thuhnuairawlhte chuan he leia nihlawhna an chan bâkah hun hnuhnungah chanvo ropui tak, leia lalram ang mai mai ni lo, ram hlun, tihchhiat theih rual loh an la chang dâwn a ni. An va nihlawh dâwn êm!