BAWLHHLAWH MALSAWMNA

SAM 37:3
Lalpa chu ring la, thil ṭha ti rawh; He ramah hian awm la, rinawmna ûm zêl rawh.

Biak in nalh tak tak kan nei a. Ṭhenkhat phei chu a mawiin a ropui hlê. Biak in hi kan Pathian in anih avang leh amah kan biakna hmun thianghlim anih avangin kan uluk tûr pawh a ni a. Amaherawhchu a enkawl kawngah leh a thianghlimna vawn kawngah erawh tûn aia nasa a kan ṭan lehzual a ngai hle.

Naupang pakhat fel deuh mai hi Kohhran pakhat chuan a nei a. Chu naupang chuan faina a ngaina a, bawlhhlawh rêng rêng a hmun lohah a paih ngai lo a, mi ṭhenkhatin thatchhe taka bawlhhlawh bâwma an vawm lût angin a ti ve lo a, a bâwmah a thlâk thlap thlap ṭhin. An Biak ina a kal chângte chuan a hung chhûnga bawlhhlawh a hmuh rêng rêng te chu a chhar ṭhin a. Miten an hmu a, ṭhenkhat erawh chuan intifel ti tein an sawi mai ṭhin.

Engahmah ngai duh lovin ṭha takin a phâk ang tâwkin an Biak in mâwi tak chu a tifai ṭhin a ni. Vawi khat chu an Biak in kawtah thil fûn hi a let bal mai a, mite chuan bawlhhlawhah ngaiin an chhar duh lo a, chu naupang pawh chuan bawlhhlawh emaw tiin a tih dân pangngaiin a bâwmah paih tumin a chhar a, mahse bawlhhlawh a lo ni hauh lo mai a. A chhûngah chuan rangkachak ṭhi nalh tak a lo infûn reng mai a, naupang chuan paih lovin an chokidar hnênah chuan a pe ta a.

Chu rangkachak ṭhi chu an Pastor nupui tih bo a lo ni reng mai a. Pastor nupui chuan a hmu lêt leh thei chu a lawm êm êm a. A chhartu naupang chu a ko a, lawmman ṭha tak a pe ta hial a ni.

Chu naupang chu ngaihsân tur dik tak a ni. A huho-a kan tih loh chuan intifel angah kan sawi a, kan ngai thei lo hial ṭhin. Danglam ngam, mite sawisêl pawh haw lo, mal tlat ngam ringtu kan nih ngam te pawh hi a pawimawh hle.

Sam 34:14
Sual kalsan la, thil ṭha ti rawh; Remna zawng la, a ûmin ûm rawh.