NIHLAWHNA THU 4-NA

MATTHAIA 5:6
Felnaa rilṭâma tuihâlte chu an eng a thâwl e; an la tlai dâwn si a.

Lal Isua hunlai chuan Israel ramah puitling pakhat ni khat hlawh chu duli a ni a. Inhlawhfaa ei zawngte chu rilṭâm hlauhawmin an awm ṭhin. Tin, mi nazawngin mahni inah tui la lûtin tui thianghlim duh tâwka in tûr an nei lo bawk. Hêngte hi hre rengin Lal Isua hian thlarau lama rilṭâm leh tuihâlte la tlai tûr thu a sawi niin a rinawm.

‘Felnaa rilṭâma tuihâl’ tih hian Pathian nung châka thlarau lam rilṭâmna leh tuihâlna a kâwkin a lang. “Sakhi, luite tui châka a thaw huam huam ang hian, Aw Pathian, ka nunna hi nangmah châkin a thaw huam huam a ni. Ka nunna hi Pathian châkin, Pathian nung châkin, a tuihâl a ni …” (Sam 42:1,2) tia kan hmuh ang nun kha he laia a rawn sawi hi niin a lang. Hetianga tuihâla rilṭâmte chuan Pathian tihtlaina an chang ṭhin a, a famkimna chu nakin, van ruai ropui kîl hunah a ni dâwn a ni.