NIHLAWHNA THU 6-NA

MATTHAIA 5:8
Thinlunga thianghlimte chu an eng a thâwl e; Pathian an la hmu dâwn si a.

Lal Isua hun laia Pharisaite leh lehkhaziaktute chu a lang chauha ṭha der, thinlung chhûng lam kha si, thlân hnawih vâr, pâwn lam mawi taka lang, a chhûng lam erawh chu mitthi ruhte leh bawlhhlawh tinrenga khat ang an ni a (Mt.23:13-28). Hetiang mi hi Lal Isuan a lâwm lo va, thinlung lama thianghlimna a phût zâwk.

Mihring pâwn lam intihthianghlimna leh ṭhat tumna aṭang hian Pathian hmu tlâk tumah kan awm lo. Bawlhhlawh leh tenawm kan nih inhriaa Krista thisena silfaite chauh hi Pathian hmu tûrte kan ni. Krista thianghlimna ṭawmpuitute chu khawvêlah pawh thianghlim taka kan nun a pawimawh. “A kotu che u a thianghlim angin, nangni pawh in chêtzia zawng zawngah lo thianghlim zâwk rawh u; “Nangni in thianghlim tûr a ni, kei ka thianghlim si a,” tih ziak a nih kha (1 Petera 1:15-16).