BERÂMAH CHANG

2 KORINTH 8:9
Kan Lalpa Isua Krista khawngaihna chu, a retheihna avânga in lo hausak theihna tûrin, hausa mah sela nangmahni avâng ngeiin a lo retheih tâk kha in hre si a.

Mi pakhat, Berâm 100 chuang nei a awm a. A Berâmte vêng tûr chuan chhiahhlawh a nei a. A chhiahhlawh chuan ni tin Berâmte chu kal chhuah puiin phûlah te a awm tîr ṭhin a.

Tlai khat chu Berâm-te an rawn haw kim ta tlat lo mai a. Pathum lai mai an bo thu a chhiahhlawh chuan a hrilh a. Berâm neitu chuan an bo dân te a zâwt a. Chhiahhlawh chuan nasa taka a zawn thu leh khâm leh ngaw dur khup-a an bo a rin thu a sawi a, chuta va zawng tûr chuan a hlauh thu pawh a hrilh a.

Berâm neitu chuan a Berâm-te chu a hmangaih em em a, a ngaina a, a rilru chuan ti hian a ngaihtuah ta a.

“Ka Berâm-te zawng tûra kei ka kal chuan ka Berâmten min hre dâwn si lo a. Ka chhiahhlawhpa lah a kal ngam tawh bawk si lo. Ka tih theih awm chhun chu anmahni anga ka insiam a, an zîng ami anga min hriat theih nân ka insiam a ngai a ni” a ti a. Tichuan, a thawmhnaw ṭha tak chu a phelh a, Berâm vun sin chungin a Berâm bote zawng tûrin a chhuak ta a.

Zân a ni tawh a, khâm leh ngaw dur khup kaltlang a ngai a, Berâm neitu chuan a hreh hle, mahse a Berâm bote chhanchhuak tûrin a kal a ngai si a. Rei tak a vah hnu chuan a hmu ta a, Berâm bote chuan anmahni angah ngaiin an zui ta a, tichuan a Berâmte chu dam takin a hruai haw leh ta a ni.

2 KORINTH 1:10 – Chutia thih hlauhawm taka kan awm chu min chhan chhuak a, min chhan chhuak leh bawk ang a; min la chhan chhuak zêl ang tih kan ring tlat a ni.

ROM 5:8
Amaherawhchu, Pathianin min hmangaihzia a lanna chu – mi sual kan nih reng laiin Krista kan tân zu thi a!