NIHLAWHNA THU 7-NA

MATTHAIA 5:9
Remna siamtute chu an eng a thâwl e; Pathian faa vuahin an la awm dâwn si a.

Juda Rabbi-te chuan mihring tih tûr pawimawh ber chu mi pahnih inkâra remna siam hi niin an ngai a. Sam 34:14-ah pawh, “Remna zawng la, a umin um rawh,” tih kan hmu.

Kan zui Lal Isua hi ‘Remna Lal’ a ni a. Kraws thiltihtheihna zâra amah nêna inrema awm tawhte chuan mi dang kan rem thei tûr a ni a. Miin min rem theih loh pawhin keimahni lam tal mi zawng zawng nên inremin kan awm tûr a ni (Rom 12:18). Sual hnathawh avângin mi mal nun ngei pawh inrem lovin a awm theih a. Nupa inkârah te, unau inkârah te, mi dang nêna inkârah te remna siamtu ni tûrin ringtute hian mawh kan phur nasa hle.

Inṭhenawm khawvênna thilah te leh khawtlâng leh ram ro-in-rêlna kawngahte pawh hian remna siamtu nih aia buaina siamtu nih mai a awl hle a. Pathian faa vuaha kan awm theih nân chhûngkaw tinte remna siamtu nih i tum ṭheuh zâwk ang u.