HUN TLÊM

THUPUAN 12:12
Vân te leh a chhûnga chêngte u, lâwm rawh u. Lei leh tuifinriatte u, Diabola chu in hnênah a lo chhuk tâk avângin in chung a pik e, hun tlêm tê chauh a nei tih a hriat avângin a thinur êm êm a ni,” tiin.

Kan damlaini a la ral ngei dâwn a, tumahin kan thih hun tûr lah kan hre lo. Engtik lai pawhin kan nun hi tâwp thei a ni a. Kan nunna lah hi a derthawng hlê.

Lawng pil zawng zawnga lâr ber ‘Titanic’ kha sawi leh ta ṭhin ila. Khawvêla khawpui ropui New York pana nuam tâwla a tawlh khûk mup mup lai khân an hma lawka thil thleng tûr kha an hre reng reng lo. Keini pawh chuang ve ila kan hriatna tûr a awm bîk lo.

Vawiinah pawh hian tu nge zanin thil thleng tûr hria, naktûkah tu nge boral dâwn hria kan awm lo. Kha Titanic lawng pil chungchangah khan Washington chanchinbu pakhat, ‘Washington Post’ an tih chuan heti hian a ziak a.

‘Lawng khalhna pindan chhûngril-ah chuan uniform ha hian phûr takin lawng chu a chak thei ang berin a tlân tîr a. Chutihlai chuan phone a rawn rî a. A ngaihsak hman lo, minit khat hnuah a rawn ri leh ṭhin a, a ngaihtuah duh lo a. Lawng khalhtu chu tihbuai chi a ni lo, mahse phone a rîk aṭanga minit thum a ral hnu chuan phone chu a la a. An hmaah vur tlang lian tak an sut dâwn avangin lawng tlân chak tak chu a rang thei ang bera titâwp tura thupêkna a ni a. Mahse khua a tlai zo tawh si a. Theihtâwpin chu lawng chu minit thum ral hma khân tihtâwp tum se chuan a ding hman mai thei a, nunna 1500 chuang lâi chhanchhuah a ni bawk ang.” tiin.

Minit khat pawimawhna hi kan hriat nawn a pawimawh hlê mai. Chu hun chu tlêm angin lang mah se kan hman ṭhat zêl chuan kan damlaini a tlâk ni thlengin a pawimawh dâwn a, kan thlarau nun tân thlengin a pawimawh a, nun lo awm leh tûr atân pawh!

JAKOBA 1:21
Chuvângin, thil tenawm chi tin leh sual tinrêng paih bo ula, in thinlunga Pathian thu tuh, chhandam thei che u chu, thuhnuairawlh takin pawm rawh u.