MI MALA PATHIAN PÂWLNA

MARKA 1:35
Tin, zîngah khawvâr hma daihin a tho va, a chhuak a, thlalêr hmunah a va kal a, chutah chuan a ṭawngṭai a.

Pathian pâwl dân chi hrang hrang a awm thei a, chûngte chu mi mal, chhûngkua leh a huhova Pathian kan pâwlnate a ni a. Chhûngkua leh a huhova Pathian pâwlna chu hmun dangah târlan a nih avangin mi mala Pathian pâwlna thu kan sawi dâwn a ni.

Mi mala Pathian kan pâwl dân tlângpui chu Bible chhiar leh ṭawngṭai a ni a. Fak hla hmanga Pathian pâwl ṭhin pawh tam tak an awm. Pathian mi hman tak hote hi Pathian pâwl tam, khûp bel tlut khawpa Lalpa hmâa ṭhingṭhi ṭhinte an ni châwk. Bible chhiar leh ṭawngṭai hi thlarau lam chaw kan lâkna a ni a. Hêngte hi kan thlahthlam chuan thlarau nun a chau lo thei ṭhin lo. Piangthar inti tam tak kan tlûk leh thuai nachhan nia lang chu Pathian pâwlna kan tlâkchham ṭhin vâng a ni.

Mi dang chaw barh nghâk ringawt lovin, mahni ngeiin chaw kan zawngin kan ei ve tûr a ni. Kan Lal Isua hi fianrial ngaina mi a ni tih i hrereng ang u.