THLARAUVA KHAT

THLARAUVA KHAT 1

EFESI 5:18
Uain ruih chîng tawh suh u, chhiatna bul a ni e, Thlarauvin khat zâwk rawh u.

School luh ni hmasa ber a ni a. Zirtîrtu chuan naupang hnênah hmuh theihin dawhkanah NO fim vek a rawn chhawp chhuak a. A chhûngah chuan lung tereuh te te a dah khat vek a, zirlai hnênah chuan a khah leh khah loh a zâwt a.

Zirlaite chuan, “A khat tawh e” an ti a. Zirtîrtu chuan, “A la khat lo ve” a ti a. A bag aṭang chuan lei nawi a ṭham chhuak a, NO fim chhûnga lung dahkhah tlatah chuan an han dah a, lung tê kârah chuan a tla khâwm ta hlawm a. Zirtirtu chuan, “A khat tawh em?” tiin a zâwt leh a. Zirlaite chuan, “Tunah chuan a khat tak tak tawh e” an ti a, Zirtîrtu chuan, “A la khat lo e” a ti leh a.

A bula tui chu no-in a suak a, a leih a, a rawn liam ta a, “A khat ta e” a ti a. Zirtîrtu chuan, “Khat tâwkah in inngai mai thei, mahse khah tâwka liam a awm lo. Kan thinlungah Thlarau Thianghlim a khah theihna turin ni tin atân hmun ruak kan siam ṭhin tûr a ni” a ti a.

EFESI 3:14-19 chuan tihian min hrilh, ‘Hemi avâng hian Pa, lei leh vâna chhûngkaw tinrêng hming chawi chhana hmaah chuan ṭhingṭhiin ka kûn ṭhîn a ni. A thlarau zârah in chhûng lam nun tihchak nân a ropuina nasa tak ata thiltihtheihna pe che u sela, rinna avângin Krista chu in thinlungah chêng sela, hmangaihnaah zung kaiin phun ngheh in ni dâwn nia. Tichuan, mi thianghlim zawng zawng nên a hmangaihna zauzia te, seizia te, sânzia te, thûkzia te chiang takin in hre tlâng thei ang. Krista hmangaihna hriat sên rual loh chu in hria ang a, Pathian famkimna tinrênga tihkhah in lo ni ang.’ tiin.

JOHANA 15:11
Ka lâwmna hi nangmahnia a awm reng nân leh, in lâwmna chu a famkim nân hêng thu hi in hnênah ka sawi a ni.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.