SAMUELA

1 SAMUELA 12:3
“… tu bâwngpa nge ka chhuhsak ngai? Tu sabengtung nge ka chhuhsak ngai? Tu nge ka bum tawh ngai? Tu nge ka tihduhdah ngai? Ka mit tidel tûrin tu lakah nge thamna ka lâk ngai? Ka rûl leh vek ang che u.”

Samuela hi a nu Hani’n Lalpa hnêna a dîl leh Lalpa tâna a hlan a ni a. Naupang tê a nih aṭanga Lalpa rawngbâwltu a ni a. Israel-ho tân dinhmun pawimawh tak a luah a, rorêltu, puithiam leh zawlnei hna a kawp a; Israel lal hmasa ber Saula leh a dawt Davida hriak thihtu a ni a. Thuthlung Hluia mi ropui ber pâwl a ni.

Samuela nunin belhchian a dâwl êm êm-na chu Israel mipuite tâna a rinawmna leh a dikna hi a ni. Lal tûr hriak a thih zawhah Israel mipui phunchiarho hmaah inthlahna thu a sawi a, a dik leh dik loh thu-ah mipui a chova, tuman a tih dik loh sawi tur an hre lo, “Min bum ngai lo va, min tiduhdah ngai hek lo, tuma kut aṭangin lâk âwm loh i la ngai hek lo, ” (I Sam. 12:4) an ti tawp mai a ni. Hetianga mi dik leh rinawm rorêltu hi Zoram mipuiin kan mamawh chu a ni.