KRISTA A NI E

KOLOSSA 1:27
Chûng mite hnênah chuan hnam tin tâna a thurûk ropui leh hlu tak chu Pathianin hriattîr a duh rêng a ni; chu thurûk chu Krista, nangmahnia awm ropuina beisei chhan chu a ni.

Sadhu Sundar Singh-a chanchin hi sawi leh ṭhin a ngai a. A chhan chu a nunah Pathian inpuanna te, a ropuina te, a thiltihtheihna te hi a taka hmuh tûr leh hriat tûr a tam êm vang a ni.

Sikh sakhua vuantu chhûngkua aṭanga seilian a ni a. Kristiante kha a tiduhdah hial ṭhin. Mahse Pathianin a nun a tidanglam a, khawvêl mite hriat khawpin a hmang ta a ni.

Khawvêl ram hrang hrang fangin a nuamah pawh a hrehawmah pawh Pathian thu a hril ṭhin a. England rama a kal ṭumin vawi khat chu Professor pakhat nên an intawng a, chupa chuan “Sadhu, Sikh sakhua aṭanga Kristian sakhua-a inlet tûr hian Kristian sakhua-ah hian eng chiah nge i hmuh a?” tiin a zâwt a.

Sadhu-a chuan, “Krista a ni e” tiin a chhâng a. Professor chu a chhanna-ah chuan a lungawi zo lo va. Zawt nawn lehin, “Eng zirtirna leh thurin vângin nge min han hrilh teh?” a ti leh a. Sadhu-a chuan, “Krista a ni e” ti bawkin a chhâng a.

Professor chuan, “Sadhu, Isua Krista chu a hming ka hria e. Mahse eng rinna leh zirtîrna danglam bîk tak Kristiante hian an neih min hrilh rawh?” a ti leh a. “Krista a ni e” tih chu a chhânna ngai a ni.

Thurin a ni lo, thil chhuina lam a ni lo a, rinna nghahchhanna lam a ni hek lo. Isua Krista-an khenbeh, tho leh-a kha, kan beisei lo kal leh tûr kha a ni, kan nun tidanglamtu chu.

1 KORINTH 2:2 – In zînga ka awm chhûngin Isua Krista leh Krawsa khenbeh a nih thu chauh lo chu eng dang mah hria nih ka tum loh kha.

TIRHKOHTE 4:12
“Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” a ti a.