RAM VEN HIM NAN THUAWIH LEH RINAWM

ISAIA 1:19-20
Tihnuam tak leh thu awih taka in awm chuan, in rama thil ṭhate hi in ei ang; nimahsela, in duh lohva in hel chuan, khandaihin a ei zo vang che u,” a ti a; Lalpa ka chuan chu chu a sawi tawh a ni.

Mizoten khawvêla kan ram neih chhun chu Mizoram hi a ni a. Kan ram enkawl leh vên him pawh kan mawhphurhna a ni. Mizoram hi kan ram a ni kan tih rualin a neitu dik tak chu Lalpa a ni tih kan hriat a pawimawh a. Ram neitu thuâwih a, a duh dâna kan nun phawt chuan kan rama thil ṭhâte hi kan ei ang a, kan hel erawh chuan khandaih ei zawh mai tûr kan ni ang.

Khawvêl sawrkar hrang hrangte chuan ram leh hnam vênhim nân ralthuam ṭha a ṭulin an hria a. He mi aia pawimawh zâwk chu, “Ṭhenkhatin tawlailîrte an ring a, ṭhenkhatin sakawrte an ring. Keini erawh chuan Lalpa kan Pathian hming chu kan lam zâwk ang,” tih hi a ni. Engkim chunga rorêltu leh thuneitu kan awiha amaha rinna kan nghah ngam phawt chuan kan ram hi malsâwmin a awm ang a, a ding chhuak bawk dâwn a ni. A tân tihnuam takin i awm phawt mai ang u.