ANGEL DUNGTHÛL
HEBRAI 13:2
Mikhualte chungah hmangaih chhuah theihnghilh suh u; chutiang tiin ṭhenkhatten hre lovin vântirhkohte an thleng si a.
Damdawi in pindan chu a reh ṭhuap hlawm a. Damlo tinreng an mu tlar tuar a, a ṭhenin lehkhabu an chhiar a, a ṭhen an hnâr thlerh thlerh mai bawk a. Room lehlamah chuan a tûka zai mai tûr, Pi Natalie-i an tih chu khawhar takin amahin a awm a.
Chu damdawi in awmna khuaah chuan a awmna a la rei loh avângin hmelhriat a nei lo a, tlawhtu pawh a nei lo a, a khua a har zual êm êm a ni. A mu thei lo va, a tûka zai tûr anih lah chu a rilruin a hre reng a, ṭah vak mai a nap a. Chutih lai tak mai chuan kawngkhâr a rawn inhawng a, nurse nula pakhat hi a rawn lût a. “I va khawhar awm ve Pi Natalie, nurse zirlai ka ni a, paper khawih tûr ka ngah deuh a, inkawm pahin i bulah hian ka lo awm ang chu” a ti a.
Pi Natalie-i chuan, “Tehreng mai, ka khua a har khawp mai, inkâwm ila” a ti a. A chanchinte an sawi a, an inkawm hnu rei lo teah chuan Pi Natalie-i pawh chu a muhîl ta a. Nurse zirlai chuan a tihtûr a tih zawh chuan a chhuahsan leh ta a.
A tûk a lo ni a, inzaina room-ah chuan an nawr lût ta a. An zai hmâ chuan Pi Natalie-i chuan, “Nizâna nurse zirlai rawn kal kha tu ber nge, kan zîngah a awm em?” a ti a. Mahse chu damdawi inah chuan nurse zirlai an awm loh thu an hrilh a, mak an ti êm êm a.
Pi Natalie-i chu lungngaihna leh khawharnain khat mah se a thil tawn avang chuan lâwmna hlîrin a khat ta zâwk a. Chu nurse nula hnênah chuan lawmthu sawi a va châk tak em! Nurse zirlai a ni tak tak ang nge Vantirhkoh ni ang le!
Eng pawh ni se, Pi Natalie-i chunga thil thleng ang hi Pathian hnathawh sawi tûr tam tak a awm. Pathian chu kan zîngah a chêng reng a ni.
MATTHAIA 13:41
Mihring Fapa hian a vântirhkohte chu a tîr chhuak ang a, a ram ata tihsualtîrtute leh thil tisualtute zawng zawng chu an thiar chhuak ang a.
