NUNNA TUI

JOHANA 7:37-38
“Tu pawh a tuihâl chuan ka hnênah lo kal sela, in rawh se. Tu pawh mi ring chu, Pathian Lehkha sawi angin, tui nung luite a pumah a lo luang chhuak ang,” a ti a.

Huan enkawl thiamte chuan thlâi chungchang an zirchianna-ah, thlâi te hi an ṭhang muang em em a, lei dep aṭanga inches 5 leh 6 vêla thûka awm an zungin tui a mamawh ang a hmuh loh phei chuan a thi mai ṭhin a ni, an ti.

Thlâi rah ṭha tak leh hrisêl tak nei tûr chuan zîng ni êng chhuah hmâ leh tlai ni tlâk lama tui pêk ṭhat an mamawh em em a. Enkawlna ṭha tak hnuaiah chuan thlâi an ṭha thei hlê a ni.

Mi thiamte chuan kâr khata tui vawi khat chauh pêka nung thei thlâi an awm laiin ṭhenkhat chu ni tina tuia châwm ngai an awm, an ti a. Chutihlai chuan tui pêk ṭhat loh thlâite chu nung ve ṭawk ṭawk mah se an ṭha tak tak thei lo va, an nih tûr ang an ni tak tak thei lo a ni, an ti bawk.

Thlâite chu an tui a hâl theih angin mihring pawh kan tui a hâl ve ṭhin a. Tui tel lovin mihring phei chu kan dam thei lo hial a ni.

Samari hmeichhia khân tuichhunchhuah bula Lal Isua a tawn khan, khawvêl tuikhur chu chawi ṭhin mah se a tui a hâl leh ṭhin thu a hrilh a, Lal Isua chuan, “Tu pawh he tui in apiang an tuihal leh ang; tu pawh an hnêna ka pêk tûr tui in apiang erawh chu kumkhuain an tuihâl lo vang, keiin an hnêna tui ka pêk tûr chu an kawchhûngah tui hna a lo awm ang a, chatuana nun thlengin a chik chho vang,” a ti.

Hmeichhia chuan, “Ka pu, chu tui chu mi pe rawh, ka tuihâl loh nân leh, heng thleng thlenga tui chawi tûra ka lo kal ṭhin loh nân,” a ti a. Chu nunna tui chu Lal Isuan a thlâwnin min pe! Thlâiten hrisêl taka rah an chhuah theihna tûra tui an mamawh angin keini pawhin Lal Isua nunna tui hi kan mamawh a ni tih hriain ni tin i tlân ang u!

THUPUAN 22:17
Thlarau leh mo chuan, “Lo kal rawh,” an ti a. A hria apiang pawhin, “Lo kal rawh,” ti ve rawh se. Tuihâl apiang lo kal sela, nunna tui duh apiangin a thlâwnin han in rawh se.