HMANGCHANG (DAMLO KAN HUNAH)

MATTHAIA 25:36
Saruak ka nihin puan mi sintîr a; ka damlohvin mi kan a.

Damlo kan hi kan tih tûr leh kan tih mêk pawh a ni. Kan hriat nawn fo tûrte chu –

1. Hospital a nih chuan an dân zah leh ngaih pawimawh a ṭha. Bengchheng leh ninawm tûra awm loh tûr a ni.

2. Damlo bulah zûk leh hmuam tih loh a ṭha.

3. Anmahni’n min beisei a nih hran loh chuan damlo kan kanin an bula ṭhut kher loh a ṭha zâwk. An nat dân a zirin inthlahrunna lian tak pawh an lo nei ve thei a ni.

4. Damlo bulah hian sawi loh tûr sawi palhte a awm thei a, an case anga nâ, thi tawh chanchinte hi sawi fo loh tûr a ni.

5. Damlo ṭawngṭaisak hi a lawmawm a, a hlu ber bawk.

6. Mi dang kai chhâwn theih tlâng hrilêng emaw natna dang emaw nei chung chuan damlo kan loh mai tûr.

7. Thlarau lam nuna thlamuang si lo, dam chhuah beisei awm si lote natna zêpsak tlat ai chuan an muan sual loh nân an natna hriattîr a, rawngbâwltu kohsak vat a ṭha.