TAR ENKAWL

LEVITICUS 19:32
Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni a, i Pathian chu i ṭih tûr a ni; kei hi Lalpa chu ka ni.

A vawi khatna turin Cathy-i leh kum lama upa tawh tak, Hank-a te chu an inhmu a. Chu putar, lu ṭuak tawh tak leh sam thur bum, rim pawh nei hial tawh bula han chêt vêl chu hrehawm a ti êm êm a. Kum lama upate chhawmdâwlna kawnga a hna thar thawh tûr chu bansan leh hial a châk a ni.

Pu Hank-a chu a chêr êm êm a, a sâng bawk si a, a lu erawh a lian a, a hâng reuh bawk si a, la hmu ngai lo tân chuan nêlawm loh tak a ni a. Cathy-i nêna an han inbiak te chuan nula tân chuan enkawl peihawm loh tak a ni a, Cathy-i chuan a hna chu a bânsan hial rêng a ni.

Ni khat chu Cathy-i lêng chhuakin chu putar chu kawng sîrah a hmu leh a, a kawr hâkte chu a ṭet hniang hnuang a, chhûngkaw nei lo ang mai a ni a, a tiang kawm chu vuanin a ṭhu mai mai pawh chu a lo sai nger nger mai a. Cathy-i chu a ding a, a khawngaih deuh avângin a kiangah chuan a va kal leh a, midangte khawngaihna thinlung a neih theih zawng zawng chu sâwmkhâwmin Cathy chuan Pu Hank-a chu a kâwm leh ta a.

Rei an inkawm hnu chuan Pu Hank-a chu tar tawh hlê mah se a rilru leh ngaihtuahna erawh a la ṭha khawp mai a, Cathy-i chuan a dinhmun zawng zawng; nupui a neih loh thu te, a chhûngten an awmpui peih loh avânga vâk mai mai a nihzia te, mi tute emawin ei tûr an pêk bâk inhnangfâkna a neih loh thu te a hriat chuan a khawngaih ta êm êm a. Chutiang dinhmun chu mi tam tak an awm a ni tih a hriatin tar ho enkawl tûr chuan a inpe leh tâ a ni.

A châng chuan pitar leh putar ṭawp tak tak, kawngpui pawh mahni-a kân hlei thei lo kan hmu fo âwm e. Pu Hank-a ang hi kan chhûngkua-ah an awm em?! Tar tawh mah se harsatna nei thei an la ni a. An ṭhianṭha ber atân kan inpe thei em le?!

Tute pawh hi Pathian zâra kan dam zêl chuan pitar, putar kan la ni vek thei a. Chutih hunah chuan ṭhianṭha, min enkawltu tûr kan la mamawh ve dâwn a ni.