ṬAWNGṬAI

SAM 65:2
Aw, ṭawngṭaina ngaithlatu, I hnênah tisa zawng zawng chu an lo kal ang.

Sam-ah hian ṭawngṭaina tam tak kan hmu a, hei hian Judaten ṭawngṭai an ngaih pawimawhzia a tarlang. Ni tin vawi thum zîng dar 09:00, chhûn dar 12:00 leh tlai dar 03:00-ah an ṭawngṭai ṭhin a, zîng lam hi Abrahama hun, chhûn hi Isaaka hun, tlâi hi Jakoba hun tiin an thliar hrang. Ṭawngṭai hian lawmthu sawi, fakna, sual thupha châwi leh dîlna zawng zawng a huam vek tih hriat tûr a ni.

Leia lalte chuan anmahni be tute sawi zawng zawng an hre reng thei lo va, an chhânsak thei vek bawk lo va, betu an tam phei chuan an tân ninawm a ni mai ṭhin. Lalpa chuan a kotu zawng zawng a hre vek a, an mamawh a chhânsak thei vek bawk a; a kotu an tam poh leh a tân chuan a lawmawm a ni mai zâwk. Pathian hnênah hian dîl ringawt tûr a ni lo va, lawmthu kan hrilh ang a, kan fak ang a, thuphate kan châwi ang a, kan duh zâwngte kan dîl ang. Kan duh ni lovin, ama duh dân kan dah lal zâwk tûr a ni.