MAHNI INDEM

1 KORINTH 4:4
Eng mah indemna tûr ka hre si lo, sawisêlbo ka ni tihna zawng a ni lêm lo, mi fiahtu chu Lalpa a ni zâwk.

‘Focus on the Family’ tih lehkhabu ziaktu, Rolf Zettersten chuan a ṭhianpa, Edwin-a chanchin heti hian a ziak.

A ṭhianpa, Edwin-a chuan car thar a lei a, a car thar chu a changkâng êm êm a, a petrol awm leh awm loh thu te, a air condition tui a zawh leh zawh loh tûr thute hrilh theitu, hmeichhe ṭawng in-record sa vek a awm a. Vawi khat pawh a office kal dâwnin a seat belt a hrên loh avangin a car-a hmeichhe ṭawngthei an dah chuan a rawn hrilh a ni.

Ni khat chu hmun hla takah a zin a. Thui tak a tlân hnu chuan hmeichhe ṭawngthei chuan petrol a mamawh thu a rawn hrilh lauh lauh mai a. Edwin-a chuan, “Ngawi lawk rawh, kan thun thuai dawn nia, ka la tlân laklawh êm mai,” tiin a chhâng ve mai a.

Nakin hnuah chuan hmeichhe ṭawngthei chuan Edwin-a chu rawn hriattîr lehin, “I petrol a zo ṭep e,” a rawn ti leh a. Edwin-a chuan, “Aw le, ka lawm e, ka hria alawm, mahse hei kan thleng ṭep tawh a, min daih thei mai ang,” tiin a chhâng a. Chutia a chhân zawh chiah rual chuan, “I petrol a zo ta e,” a rawn ti a. Edwin-a thinin a tuar ta lo a, “Nang hmeichhia te te, i va bengchheng ve,” ti chung chuan a record-na hrui chu a ti chat ta hmiah mai a. A reh chiang hle!

A hnu lawkah chuan kawng sîrah ṭhu sawp nuaiin Edwin-a chu a indawm kun tlawk tlawk a, “Aw, petrol chu lo thun ve mai ila chu ka thleng tawh tur a nia,” a ti a ni.

Aw le, Pathianin kan ṭhatna tûrin hlauhawm lo thleng tûr te min hrilh lâwk ṭhîn a, khawvêl thil tak pawhin vauna leh zilhna pawh kan tawng ṭhîn a ni. Kan chhia leh ṭha hriatna chuan ṭha leh ṭha lo a hria a, chutah chuan thutlûkna pawimawh tak kan siam tûr a ni.