PATHIAN LALNA (ENGKIMTITHEI A NI)

JOBA 42:2
Engkim i ti thei tih ka hria e, I tum dâl rual eng mah a awm lo.

Khawvêl ram ropui leh thiltithei deuh America, Russia, China, etc. te hi ram dang tân biak chhiat tak tak theih an ni lo. A chhan chu thil an tih theih avângin ram dang tân an hlauhawm tlat a ni. Joba hian Pathian lalzia leh thiltihtheihzia a hmu chiang hle, ‘Engkim i ti thei tih ka hria e,’ a ti tawp mai a ni.

Ram ropui deuh leh thiltithei deuh nia kan sawite zîngah pawh engkim ti thei tumah an awm lo. Chutiang a nih laiin kan Pathian chu ‘Engkimtithei Pathian a ni.’ Hei hi Davida khân a hmu fuh em em a, ”Aw LALPA, ropuina te, thiltihtheihna te, chawimawina te, hnehna te, lalna te hi i ta a ni,” (1 Chro.29:11) tiin mawi takin a lo chham chhuak ve bawk a. He Engkimtitheia hi kan Pathian a nih avângin kan zâm tûr a ni lo va, engmah hi kan huphurh tûr pawh a ni lo. ”Pathian nên erawh chuan engkim tih theih a ni,” (Mt. 19:26b.) tiin kan Lal Isua pawhin min lo hrilh dim diam tawh a ni.