ṬAWNGṬAINA THLAHDAH LO

MATHAIA 26:41
Thlêmnaa in tlûk luh loh nân invêngin ṭawngṭai rawh u, thlarau zawngin a huam a, tisa erawh chu a chak lo va ni,” a ti a.

Africa ramah chuan hnam pakhat hian ṭawngṭai chungchangah tih danphung an nei a. Mitinte chuan hmun fianrialah ṭawngṭaina hmun an nei a. Ni tin an kal ṭhin avangin an ṭawngṭaina hmun kalkawng chu a bel hlun mai ṭhin a. Mi tuin emaw ṭawngṭai a thlahdah viau chuan ṭan la thar tûr leh ṭawngṭai taima tûrin, “Ṭhiana, i ṭawngṭaina hmun kalkawngah hnim ṭo kan hmu e,” tiin an hrilh ṭhin a ni.

Ṭawngṭai hi thlahdah thei kan ni lo. Billy Graham-a chuan, “Ṭawngṭai thlahdahtu chu thiltihtheihna nei lo kristian a ni,” a ti hial a. Andrew Boran-a pawhin, “Thil tih hmaih azawnga tih hmaih sual ber chu ṭawngṭai hmaih hi a ni,” a ti bawk.

England mi John Fletcher-a kha pa danglam tak a ni a, a kristianpui a hmuh apiangin chibai bûk nân, “Ṭawngṭaina hmunah kan inhmu dawn nia,” a ti ziah a ni. Chu chuan ṭawngṭai ngai tawh lo kristian-ten ṭawngṭai an ngaihzia leh Pathian pâwl an mamawhzia a hriat nawn tîr ṭhîn.

China rama missionary ropui J. Hudson Taylor-a kha ṭawngṭai taima tak a ni a. A fapa, Howard Taylor-a chuan, “Tûn kum 40 chhûnga khawvâr zawng zawng khân ka pa ṭawngṭaina hmu lovin ni chhuak a hmu hmasa ngai lo,” a ti hial.

Ṭawngṭai pawimawhna hi mi tam tak chuan an hmu chiang êm êm a. Ṭawngṭai ngai lo tân a pawimawhna leh thiltihtheihna engtin nge an hmuh theih teh reng ang ni! Peter Marshall-a chuan, “Kan ṭawngṭai hian hun kan khawhral lo va, ṭawngṭai lova hna kan thawh emaw thildang kan tihin hun kan khawhral zâwk a ni,” a ti.