THO LEH PATHIAN

ROM 6:9
Krista chu mitthi zîng ata kaihthawhin a awm a, a thi leh dâwn tawh lo tih kan hria, thihna chuan a chungah thu a nei tawh lo.

Tho leh Krista ringtute kan ni a, thihna hneha tho lehin a thlarau-a min awmpui tawh tûrin nungin vânah min lâwnsan a, min rawn hruai leh tûrin amah ngei chu a rawn kal leh dâwn a, a kuta kilhna ser ngei chuan min la rawn hruai dâwn a ni. Chu chu kan rinna leh kan beiseina thuril tak a ni.

Ni khat chu Muslim pa pakhat hian Kristian hnenah, “Nangni Kristiante nêna kan danglamna a awm. Keini chu Medina-ah kan kalin mitthi kuangah Muhammad a takin hmuh tûrin a awm reng a. Mahse nangni Kristiante chu Jerusalem-a in kalin thlân ruak, engmah awm lo in hmu a ni lo ve’m ni?” a ti a.

Kristian chuan, “Ka lawm e, i sawi dik takzet. Keini kristiante hian thihna hneha tho leh Krista Pathian nung rawng chu kan bâwl reng a ni,” a ti.

Kum tak tak liam taah khan, Turkey rama missionary pakhat hian Muslim-te hnênah Isua an rinchhan hrilhfiah harsa a ti êm êm a. Mahse vawi khat chu an zin ho a, kawng an bona-ah chuan Muslim milim ‘Mi thianghlim’ an tih hi a awm a. Missionary chuan, “In mi thianghlim saw va zâwt teh ang u khai,” a ti a. Mahse Muslim-te chuan, “Minung lovin min chhâng lo vang,” an ti a. “Saw inah sâwn mi pakhat a awm a, va zâwt zâwk teh ang u khai,” an ti a. Missionary chuan chu chu remchângah a la a, “Mitthi tawh Muhammad-a chuan kawng a hrilh thei lo che u a ni. Mahse Isua Krista chu a nung a, amah in rin chuan a chhandam dâwn che u a ni,” a ti a.

1 KORINTH 15:14
Krista kha kaihthawh a nih si loh chuan kan thu hril hi dâwt a ni ang a, dâwt ring lek in ni bawk ang.