LALPA ṬIH

JOBA 28:28
Tin, mihring hnênah, “Ngai rawh, Lalpa ṭih hi, hei ngei hi finna a ni, Thil ṭha lo kalsan hi hriat thiamna a ni,” a ti a.

‘Lalpa ṭih’ tih awmzia chu ‘Pathian zahawmzia, ropuizia leh thiltihtheihzia hriatchianna aṭanga a thu awih a, a duhzâwnga nun hi a ni’ kan ti thei ang.

Lalpa ṭih leh sual kalsan hi a inzawm tlat a, Lalpa ṭihtu chuan sual a kalsan ṭhin a, Lalpa ṭih lo mi chu sual nên an inthlunzawm tlat ṭhin. Pathianin Abrahama hnêna Isaaka hlân tûra a tih, a zawm mai theihnate kha Lalpa a ṭih vâng a ni a (Gen.22). Potiphara nupuiin a pindan chhûnga Josefa a thlêm a, Josefan a hnar theihna chhan pawh kha Pathian a ṭih vâng a ni (Gen.39). Hêngte hian Lalpa ṭihtute chuan anmahni aiin Pathian duh dân an dah pawimawh hmasa zâwk ṭhin tih a tichiang nghâl.

THUFINGTE 8:13
Lalpa ṭih chu sual huat hi a ni; Chapona te, uanthuanna te, thil ṭha lo tih chîn te, Ṭawng chaltlai te hi ka haw takzet a ni.