LEHKHA CHHIAR

JOHANA 20:30-31
Tin, Isuan zirtîrte hmaah chuan chhinchhiahna dang tam tak a ti ṭeuh va, chûng chu he lehkhabuah hian ziak a ni lo; nimahsela, hêng hi Isua chu Krista, Pathian Fapa a ni tih in rinna tûr leh, in rina, a hminga nun in neihna tûrin ziak a ni.

Thuziak hian thil a tithei a, lehkhabu ṭhain min hruai ṭhat theih êm êm laiin lehkhabu ṭha lovin min hruai sual hlê thei bawk.

John Wesley-a, theologian ropui tak chuan, “Inchhiar zâu lo kristian chuan hmâ a sâwn ngai lo ang a, inchhiar zâu ṭhin kristian chuan hmâ a sâwn ngei ang,” a ti a ni.

Paris khawpuiah America rama mipui hriat hlawh leh mi ropui Benjamin Franklin-a leh a ṭhianten zanriah an kîl ho dâwn a, an inpuahchah lai chuan ṭhian pakhat chuan Franklin-a hnênah, “Khawvêlah eng ang mi nge mi mâwl bera i ngaih min hrilh thei em?” tiin a zâwt a. Franklin-a chuan, “Ruah sûr laia pa awm mai mai, lehkhabu chhiar nachâng hre lote chu mimâwl ber an ni,” tiin a chhâng.

Chinese chuan an thufingah, “Ni thum chhûng engmah kan chhiar loh chuan kan thusawi rêng rêngah finna pakhatmah a awm lo,” an lo ti bawk.

Ziak leh chhiar thiam loh avânga lehkhabu chhiar ngai miah lo kan awm tawh awm lo ve. Chutih lai erawh chuan kan lehkhabu chhiar tûr uluk takin kan thlang tûr a ni. Chûngah chuan hêng hi kan inzawh a pawimawh; A rintlâk em? A zirtîrna a him em? Huapzo a ni em? Ṭan lam a nei em? tih thlengin kan ngaihtuah a ṭûl a ni.

Kristian kan nih chuan kristian chhiar âwm kan chhiar tûr a ni a, a ngaihnawm lam ringawt aiin kan thlarau nun châwm thei tûr leh nun kawng dika min kaihruai thei tûr thlan thiam hi a finthlâk a ni.

Lehkha chhiar hi kan ngaihtuahna leh rilru tân a ṭha a, kan taksa tân pawh exercise ṭha tak a ni reng. – Joseph Addison