HMANHMAWH DUH SUH

THUPUAN 3:11
Ka lo kal thuai dâwn e, i thil neih sa kha vawng tlat la; tichuan, tu man chawimawina lukhum i chan tûr chu an chhuhsak lo vang che.

Thuhriltu pakhat chuan tihian a sawi: Vawi khat chu Setana leh a hote hi an inhmukhawm a. A hote hnênah chuan, “Kristiante hian an Pathian an hlat theihna tur atân eng hmanrua nge hman ṭha ber ang le, i han sawi ho teh ang,” a ti a.

Pakhat chuan mahni inringtâwk takin, “Kristiante beng bulah Pathian a awm lo tiin kan sawi chiam ang,” a ti a. Chu chhânna Chu Setana’n a ngaihtuah vang vang hnu chuan, “Mihring tam zâwkin an thinlungah Pathian chu a awm ngei a ni tih an hria a. He hmanrua hi chu a ṭha tâwk lo ang,” a ti a.

A dang leh chuan, “Kristiante hnênah chuan Pathian a awm a, mahse hremhmun a awm lo, kan ti ang,” a ti a. Setana chuan, “A tha tâwk lo,” a lo ti nghal a. “Mi tumah Pathian hnên ata kan hruai bo thei lo ang. He khawvêla an awm chhûng pawhin hremhmun ang maia hrehawma awm an awm hi,” a ti leh a.

A pathumna tûrin pakhat a rawn ding chhuak ve leh a, “Kristiante beih dân tûr kawng dang ka hria e. Mihringte hnênah chuan Pathian a awm thu ka sawi ang a, hremhmun pawh a awm thu ka hrilh ang. Mahse hmanhmawhna tûr engmah a awm lo tih ka hriattîr ang,” a rawn ti a. Chu velah Setana chuan ring takin, “A va ṭha kher êm! Chutiang chuan va ti ula, hnehna in chang ang,” a ti a.

Min tikhawtlaitu hian kan hun min khawhral tîr mai lo va. Chatuan nunna thlengin min rûksak thei a ni. Khawvêl mi tam tak chu hmanhmawh lohna sualah an tlu lût mêk a ni. Pathianin Johana hnênah khan, “Ngai teh ka lo kal thuai dâwn e,” a tih kha. He khawvêl thilte ngaihvena buai buai tûr kan ni tawh lo ve. Lal Isua lo kal a hnai tawh takzet a. Chhandamna kim chang tûrin muangchâng thei kan ni tawh lo.

ROM 13:12
Zân hi a ral lek lek tawh a, khua a vâr dâwn ta; chhûn ênga awmte angin mawi takin khawsa ila, thim thiltih chu paihin, êng thuamin i inthuam ang u.