I LEI HLÂN RAWH

JAKOBA 3:6
Tin, lei hi mei a ni; kan taksa pêngte zînga khawlohna hlâwm chu lei hi a ni; chu chuan taksa a pumin a tibawlhhlawh a, pianpui tawlailîr chu a tikâng a, amah chu hremhmun tihkan a ni.

Mei tê taktêin ram zau tak tak leh in lian tak tak a kâng chhe vek thei ang hian lei tê tak tê hian mi huatthu sawiin mi pawi lian tak a khawih thei a. Taksa pêng dang zawng zawng aiin lei hian mi dang pawi a khawih tam zâwk fo. Mihring hian mi ṭhatna leh fak an phûna lam ai hian an mâwi lohna lam hi târlansak kan châk zâwk fo va, chûng ngaihtuahna ṭha lo chu chhûng lam aṭangin lo kal mah se kan lei ber Pathian hnêna kan hlan chuan mi dang pawi a va khawih pha tak tak tawh dâwn lo a ni.

Fak hla siamtu chuan, “Aw LALPA, ka kâ bulah hian vêngtu ṭhuttîr la; ka hmui kawngkhâr hi vêng ang che,” a ti a (Sam 141:3). Kan hmui hi kan chîp tlat chuan tu pawi mah kan sawi ngai lo va, kan chîp loh hian lei hian mi dang pawi a lo sawi leh mai ṭhin a. He Sam hi kan ṭawngṭai hla ni ve nghal ṭheuh rawh se.