JOSEFA FIAHNA

GENESIS 45:5
Nimahsela, heta kal tûra mi hralh avâng hian lungngai suh ula, mahni inhaw duh hek suh u; mite nunna chhandam tûrin Pathianin in hmaah mi lo tîr hmasa a nih hi.

Josefa hi a pa Jakoba pawhin a unau dangte aia a duat bîk deuh a ni a. A u ten an îtsik a, khuarkhurumah an thlâk a, chu mi hnuah Ismael-ho hnênah an hralh leh a. Potipharan an kût aṭangin a lo lei ve leh a. Potiphara nupuiin mutpuiah sâwmin fiahna hautak zet mai a tâwk a, Pathian a ṭih tlat avângin thlêm thlûk zawh a ni lova, Potiphara nupui hêkna avângin a tâng a, a chhuah leh hnuah Pharaoa hnuaia hotu berah a awm ta a, Aigupta mipui tân leh a chhûngte tân pawh malsawmna a lo ni ta zâwk a. A unaute hnênah pawh, “Pathianin in hmaah mi lo tîr hmasa a nih hi,” a ti hial a ni.

Pathian hian a hmanraw ṭangkai tak ni tûrte chu fiahna meipui a kaltlangtîr ṭhin. Fiahna hi vanduainaah ngaih mai a awl hle a, Pathian thil tum eng nge ni? tia a lam kan hawi zêl zâwk a pawimawh êm êm a ni.