CHAWIMAWINA AIIN

MATHAIA 19:21
Isuan, “Ṭhat famkim i duh chuan, kal la, i thil neihte hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a.

Chanchinbu mi leh khawpuia mi pawimawhte chu kum 1953 khan Rêl chawlhhmunah tlai khat chu an rawn kal khâwm hlawm a. An mi hmuh tum leh hmuah chu kum 1952-a Nobel Peace Prize dawngtu, Dr. Albert Schweitzer a ni.

Rêl a rawn thlen chuan mi tam tak an phe suau suau a, an innêk nuai nuai a, chutih lai tak chuan pa lian tak, fit 6 leh inches 4 laia sâng, sam buk chhem chhum leh hmuihmul nei chhep chhup chu rêl aṭangin a rawn pên chhuak a. Camera an lo hmet de chiai chuaia, a ṭhenin chibai tumin an kut an rawn phar suau suau bawk a. Mi ṭhenkhatin kawm tumin an rawn innêk phei a, an ngaihsânzia hrilh tum mi tam tak nên an ri nuai nuai mai a ni.

Dr. Albert-a chuan lawmthu hrilh hlawm mawlh mawlh pah chuan, “Min lo hrethiam lawk teh u,” a ti a. Mipui kârah chuan a inzep phei a, a piah lawka pitar pakhat, suitcase pahnih rit tak khai chu panin a va ṭanpui a, bus-a chuang tûr anih avângin bus dinna thleng chuan a hruai ta a, tluang taka zin tûra duhsakna a hlan hnu chuan a rawn lêt leh a. Mipui hnênah chuan, “Ka innghahtîr che u avângin in ngaihdamna ka dil e,” a ti a.

Africa rama Dâktawr lâr tak, mi rethei leh ṭanpui ngaite ṭanpuitu, Missionary Dâktawr, Dr. Albert Schweitzer chu mite entawntlâk nun nei a ni. Khawvêl ropuina um ai chuan chanhai leh riangvaite ṭanpui chu tih tûr hmasa berah neiin mit ngeia a lo hmutu pakhat chuan, “Sermon kal thei ka vawi khat hmuhna a ni,” a ti.

Keini pawh tûn aia nasa zâwkin ṭan han la leh ila, kan nunah Isua Krista hmêl mâwi tak miten an hmuh theihna tûrin kan chezia chu Isua Krista-ah tihfelin lo awm zêl rawh se. Chu chu sermon ropui ber a ni.

SAM 72:13
Retheite leh pachhiate chu a khawngaih ang a, Mangangte nunna chu a humhim ang.