DUHTHLANNA DIK THEI LO
LUKA 18:25
“Mi hausa Pathian rama luh aiin, sanghâwngsei hriau benga luh tlang a awl zâwk a ni,” a ti a.
Naupang hla ni-a kan hriat mai ṭhin, ‘Khawvêl sum tinrêng leh lunghlu, ka dîl lo nawmsakna nên, Rilru mawi leh thianghlimna chu ka dîl zâwk chûng zawng ai chuan,’ tih kha puitling tân pawh a pawimawh ta hle mai.
He hla phuahtu hian he khawvêl sum leh pai leh thil hlu tinrengte hian kumtluang a daih dâwn chuang lo tih hriain, chûng zawng zawng ai chuan chatuana daih tûr neih theihna rilru mawi leh thianghlim a dîl zâwk a ni.
Keini ringtute pawh hian inelrelna leh a dik lo zâwnga sum leh pai sânna-a kan inumna hi paih bovin rilru thianghlim leh mâwi nei thei dial dial ila chuan kan Kohhran leh chhûngkua pawh hi tûn aiin kan inhmangaih ngei ang.
Vawi khat chu sunday school zirtirtu hian naupang hnênah, “Mihausa pa kha nge nih in duh Lazara?” tiin a zâwt a. Naupangho chu an inenkual ralh ralh hnu chuan pakhat, mawngzâng tak hi a rawn ding nalh a, “Ka damlai chuan mi hausa pa nih ka duh a, ka thih hnu-ah erawh chuan Lazara nih ka duh e,” a rawn ti a.
He naupang chhânna hi uluk taka kan ngaihtuah chuan tûnlai khawvêl ringute chhânna a ni thei âwm e. Kan damlai hi chuan nuamsa ila, hausa ila, in leh lo leh khawvêl sum tinreng nei ila kan ti a, Pathian duh loh zâwng tinêpin kan duhzâwng anih chuan mahni leh mahni thiam kan inchantîr a. Mahse kan thih hnu-ah erawh Lazara nih kan duh tho ṭhin. A theih hauh lo ang.
He khawvêl ropuina te hi châkin kan tlân suau suau a, mahse boralna kawng kan zawh mêk zâwk a lo ni si a.
1 JOHANA 2:17
Khawvêl hi a châknate chawpin a boral mêk a ni; Pathian duh zâwng titu erawh chu kumkhuain a awm reng ang.
