KRISTIAN CHAUH KAL

1 THESALONIKA 4:17
Chumi hnuah chuan keini nungdama la awm rengte hi, boruakah Lalpa hmuak tûrin, anmahni rualin chhûm zîngahte khian lâk chhohvin kan awm ang a, Lalpa hnênah kan awm kumkhua tawh ang.

Kum zabi 18-na hunlai vêla Methodist Kohhran dintu, Anglican Evangelist ropui tak, thusawi thiam leh Theologian ni bawk John Wesley-a chuan a rawngbâwlna-ah hetiang hian a mumang a sawi ve thung a.

“Vawi khat chu mumang ka nei a, ka mumangah chuan hremhmun-ah ka lo kal a. Hremhmun kawngkhâr ka thlen chuan ka han kik dawt dawt a, ‘In awm em, Roman Catholic mi leh sa an awm em,’ ka ti a. ‘Aw awm e,’ tiin min rawn chhâng a.

A hnu deuh-ah chuan, ‘A nih leh hremhmunah chuan England Kohhran te, Lutheran Kohhran te, Calvinist te an awm em?’ tiin ka han zâwt leh a. Anni chuan, ‘Aw awm e,’ an rawn ti leh a. Kei chuan, ‘Affin leh John Wesley-a leh amah zuitute an awm ve em?’ ka ti a, “Aw awm e,” tih chu min rawn chhânna bawk a ni.

A zawhna tâwp ber chhânna chuan a lung a tihnûr hle mai a. Tichuan ka kal ta a, Vânram kawngkhâr ka thleng leh ta a. Kei chuan, ‘Roman Catholic te, England Kohhran te, Lutheran te, Calvinist te leh John Wesley-a zuitute an awm hlawm em?’ ka ti a. Chhânna ka dawn chu ‘Hetah chuan chutiang pâwl mi pakhatmah an awm lo ve,’ tih a ni.

Kei chuan, ‘A nih leh tute nge awm le?’ tiin ka han zâwt leh hrâm a. A chhûnga mite chuan, ‘Hetah chuan Kristiante chauh an awm a ni, a bâk i sawi dang kha chu kan hriat ngai an ni lo ve,’ an rawn ti a ni.” tiin.

1 KORINTH 1:24
Nimahsela, Juda pawh ni se, Grik pawh ni se, kohte tân chuan Krista chu Pathian finna leh thiltihtheihna a ni.