THO LEH PATHIAN
LUKA 24:5-6
An hlau va, lei bihin an kun tlat a. Chu mite chuan an hnênah, “Engati nge mitthi zîngah mi nung in zawn? Hetah a awm tawh lo, kaihthawh a ni ta. Galili rama a awm laia in hnêna a sawi kha hre reng rawh u”.
Russia ramah chuan Isua thawhlehni (Easter day) hian Greek orthodox kohhran puithiamte chuan chîn dân an nei ṭhîn a. An inkhâwm hmain puithiam (rawngbâwltute) chu Biak ina lût mai lovin pâwnah an inhmukhâwm a, an Biak in chu vawi thum an kal hual ṭhîn a ni. Chutia Biak in vawi thum lai an kal hual chuan Isua taksa, thlâna phûm chu an zawng tih a entîr a, an kal hual zawhah Biak in chhûngah chuan an lût a, inkhâwm tûr mipui an lo ṭhu ṭhup tawh a. Tichuan an au rual a, “Isua chu a tho leh ta e,” an ti a. Chuveleh Kohhran mipuite chuan, “A tho tih a chiang a ni,” an ti rual ve leh ṭhîn a ni.
Isua Krista thawhlehna hi chanchin hlui chul thei lo, Kristiante chuan vawiin thlenga kan la puan chhuah a ni. A tho leh ngei a ni tih Bible-in min hrilh.
Matthaia 28:1-7 ah chuan, ‘Sabat ni a lo ral a, Pathianni zînga khua a vâr dâwnin Magdala mi Mari leh Mari dang chu thlân en tûrin an kal a. Ngai teh, lîr nasa takin a lo nghîng a; Lalpa Vântirhkoh vân aṭangin a lo chhuk a, lung chu a rawn lum sawn a, a chungah a ṭhu ta a. A lan dân chu kâwlphe ang a ni a, a silhfênte chu vûr angin a vâr a. Amah an hlauh êm avângin vêngtute chu an khûr a, mitthi ang maiin an lo awm ta a. Vântirhkoh chuan hmeichhiate chu a bia a, “Nangni chuan hlau suh u, Isua an khenbeh kha in zawng tih ka hria e. Hetah a awm tawh lo ve, a sawi ang ngeiin kaihthawh a ni tawh a, a mutna hmun hi rawn en teh mah u. Tin, kal thuai ula, a zirtîrte hnênah, ‘Mitthi zîng ata kaihthawh a ni ta, Galili ramah a lo kal hmasa dâwn a, chutah chuan amah in hmu ang,’ ti ang che u. Ngai teh u, ka hrilh tawh che u hi,” a ti a.’ tiin kan hmu.
Lal Isua ngei pawhin, “Mi Nunga chu ka ni, ka lo thi a, nimahsela ngai teh, kumkhua atan ka nung leh ta a ni. Thihna leh Mitthi Khaw chabite chu ka nei bawk a.” (Thupuan 1:18) a tih kha. Lal Isua thawhlehna hian kan rinna tipungin lo tichak deuh deuh rawh se. Amen.
