LÂWM RAWH U

PHILIPPI 4:4
Lalpaah chuan lâwm fo rawh u; ka ti leh pek ṭhîn ang, lâwm rawh u. In dawhtheihzia mi zawng zawng hriat ni rawh se. Lalpa chu a hnai e.

Khawvêlah hian mi hlim thei tak tak an awm laiin mi lungngai tak tak an awm ve bawk. Lâwm êm êm an awm a, hrehawm ti êm êm an awm bawk. Hlimna leh lâwmna nei thiamte nunah hian engkim hi an chungah an duh angin a thleng vek bîk lo a. An chunga lo thleng engpawh chu a lo dawnsawn dân an thiam vang zâwk a ni.

Hmâkhaw êng tak nei tûrin thawhrim a ngai kher lo a, chumi nei tûr erawh chuan kan hun thim tak tak liam tawh te theihnghilh hi a pawimawh berte zînga mi a ni. Kan hun kal tawha kan natna te, hrehawmna te hre reng chung chuan ke pên a har êm êm a ni.

Hun duhawm lo ber kan tawn lâi te, mi chak leh huaisen kan nih leh nih loh hriatna tûr atâna fiahna râpthlâk tak kan tawh lâite hian engtin nge kan awm ṭhin. Tih chakin kan awm nge beidawnna leh hnualna hlîrin kan khat a, harsatna chu kan su ngam lo ṭhin zâwk le? Kan chunga lo thleng hian min her danglamin min tichhe zâwk nge ni a kan chunga lo thleng apiang kan lo her rem zêl zâwk le!

Carrot hi a chang thawkhat viau a, mahse tuisa a ngam lo a, tuiso-a chhum anih chuan a nêm vek ṭhin. Mahse coffee bean an tih chu tuiso-ah an thlâk a, tuiso zâwka kha a rawng a tidanglam a, tin, in tûr tui takah a siamchhuak ta zâwk hlauh a ni.

Miten ‘a nui reng a, hmuh a nuam ngawt mai’ an tih hial tûr khawpa hlimna nei kan ni thei. Fiahnaten min tichak se la, lungngaihnaten min tipuitling zâwk se la, beiseina ten hlimna min pe reng rawh se.

Kristiante phei chu khûr chunga lâwm reng tûra zirtîr kan ni a. Lawm reng tûr, hlim reng tûra kan Pathianin min duh avang tak hian hmêlma pa erawh chuan min tilungngai tûrin hna a thawk reng thung a ni.

SAM 2:11
Ṭih chungin Lalpa rawng bâwl ula, Khûr chungin a hmaah kûn rawh u.