INNGAIHTLAWM HI MI DANG TAN DAMNA A NI

JONA 1:12
Ani chuan, “Mi la kâng ula, tuifinriatah mi paih rawh u; tichuan, tui fâwn a reh mai ang. Keimah avângin he thlipui na tak hian a rawn nuai che u a ni tih ka hre reng a ni,” a ti a.

Jona chu Ninevi khawpuia simna thu tlângaupui tûra tirh a nih laiin Tarsis lam pan lawngah a chuang a. Thlipui na takin a nuai avangin mangang takin an awm a. Amah avanga thlipui leh tuifâwn tuar an nih a inpuang a, ‘keimah avangin’ a in tih ngamna chu a chuanpui mi dangte tân damna a lo ni a, ama tân ngei pawh a ni bawk.

Mihring lei leh kâin sawi chhuah harsa a tih ber chu ‘ka dik lo a ni’ tih hi a ni e, an ti a, a dik hlein a rinawm. Mi dang dik lohna kan hmuh theih viau lai hian mahni dik lohna chu kan en khûm fo. Mahni dik lohna sawi chhuah ngamnaah hian mi dangte pawh an lo dam zâwk ṭhin a, chutah chuan kan tân pawh damna a lo awm a, chu chuan rilru lama natna neiteah pawh damna leh inremna a thlentîr ṭhin a ni.