BIBLE INHAWNG

JEREMIA 23:29
“Ka thu chu mei ang a ni a, lung chhutkehna tuboh ang hi a ni lo vem ni?” tih hi Lalpa thuchhuak a ni.

Pathian thu nihna ropui tak chu Hebrai 4:12-ah khan chiang takin kan hmu, “Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.” tiin.

Tirhkoh Paula khan Chanchin Ṭha a zahpui lo a, engtik lai pawha hril tûrin a inpeih reng a ni. Pathian thu thiltihtheihna kha chiang takin a hria a, chuvangin a aia thildang chhuan tûr a nei lo.

Ṭhianzaho nuna Pathian thu thlen dân hetiang hian Pastor pakhat chuan a sawi. Chawlhkâr tâwp chu ṭhianzaho tân inkawmna hun thâwl nuam tak a ni a, zu an in ho a, pawisa an khêl ṭhin a, a thlengtupa nupui tân chuan a thaw ipik thlâk êm êm a, mahse a pasalte ṭhianho awmdân chu tihreh dân a thiam lo a, Pastor hnênah ṭanpuina a dîl ta a.

Pastor chuan an inkawmna hmun dawhkânah chuan Bible inkeu dah ziah tûrin a hrilh a. Chutia a tih hnu chuan an zînga pakhat chu a rawn kal ve ta ngai lo a, tichuan an kiam ta pheuh pheuh a, a tâwpah phei chuan a pasal pawh chu a inhmuchhuak a, Pathian lam a hawi phah ta a ni.

An dawhkâna Bible inkeu khan sual tihna hmun leh hun remchang chu a tibo a, Pathian ropuina leh thiltihtheihna nasa tak a luantîr ta zâwk a ni.

Pathian thu chuan thinlung sak ber pawh a tikehsawm vek thei, sualna avânga beidawnna te, ṭha thei tawh lo a ngaihna te hi Pathian thu-a kan beidawnna tilangtu a ni a, sual Setana min bumna mai a ni.

EFESI 6:17
Chhandamna chu lukhumah hmang ula; Thlarau khandaih, Pathian thu chu pai rawh u.