VÂNRAM MI

1 PETERA 2:21
Hetianga awm tûr hian koh in ni, Krista pawh khân in tân a tuar a, a hniakhnung in zui theih nân entawn tûr a hnutchhiah che u kha.

Kum 1958-ah China sawrkar chuan China ramah Biak in zawng zawng an khâr a. China ramah Kristianna a thi a, Museum-ah phûm bo a ni tawh tiin an sawi hial ṭhin.

Kum 1970-ah khan USA Kohhran hruaitute pawhin, “China ramah Kristian pakhatmah hmuh tûr an awm tawh lo,” tiin an report a. Kohhran chu a zung chawpin pho ro a ni.

Mahse vawiinah chuan Chinese Kohhran chu rose pangpâr kuhmum, mawi taka lo pârchhuak angin a mawina leh nunna chu khawvêlah a rawn pho chhuak leh a, Kristian maktaduai sawm chuang lai an awm leh tawh a ni.

Chu dinhmun an thlen leh theihna tûr chuan tuarna râpthlâk tak paltlangtu an lo awm reng a, chu pa chu Henan bial-a râwlthar harhvang tak, Brother Yun-a a ni. A tawrhna chu sawiin a siak lo a, Khawvêl mite chuan lei mihring pawh a ni lo e, ‘Heavenly man’, ‘Vânram mi’ an ti ta hial a ni.

Chaw ngheiin ni 100 lai Bible dîlin a ṭawngṭai a, miten a â tawhah an ngai a, mahse Pathianin kum 16 mi lek Bible a pêk dân te chu ropui tak a ni. Pawl 3 thleng chiah a zir a, harsa takin Bible a chhiar a, mahse Thlarau thianghlim puihnain Matthaia ziak a vaiin a thiam vek a, inlârna a hmuh angin khawthlangah Pathianin a thu puang tûrin a ko a, zân zânah kêin a chhuak a, thuhril awmzia a hre lo, mahse Matthaia bu pum, bung 1-28 chu en lovin a sawi chhuak tawp mai a ni.

A mâwlna leh retheihna ang angin a lang a, mahse Pathian inpuanna chu, chu Brother Yun-a retheihna leh tlâwmna-ah chuan a ropui zual zel a. Kum 40 hnu-ah chuan China ramah heti zât Kristian leh Kohhran an lo awm leh thei ta a ni.

A lehkhabu ‘Heavenly man’ tih chu khawvêlah tam tak hralh a ni a. Ṭawng tam taka lehlin mêk a ni bawk.

Pathiana i inpêk chuan a lo hmang nghâl ang che. Pathianin a hman chu a hlawhtling ṭhin.
– Oswald Chambers