MI TIN TA TÛR CHANCHIN ṬHA

LUKA 2:10
Tin, vântirhkoh chuan an hnênah, “Hlau suh ulang, ngai rawh u, mi tin ta tûr chanchin ṭha lâwmawm êm êm ka rawn thlen che u a ni.

Khawvêlah hian ṭha si, hlu si, mawi bawk si mi tin ta tûr leh mi tin daih a vâng khawp nia! Mi hausa deuh chuan a ṭha chi te, a tlo chi te leh a mawi chi te chu an nei thei mai zêl a; mi rethei zâwkte tân chuan vâna rah ang a ni ṭhin lawi si. Hlâwkna tûr thil ṭha tak kan han hmuh leh hriat te hian min an hriat ve hlauvin kan thup ṭawk ṭawk ṭhin. A mihring zâwng pawhin mi ṭha tak tak chu an awm ve, mahse an ram tân chauhva ṭha te, an pâwl tân chauhva ṭha te, an party tân chauhva ṭha te an ni a, an ṭhat chhûngin kum rei a daih ngai bawk hek lo.

Lal Isua erawh chu mi chi tin, ṭawng tin leh hnam tinte tân a ni a. Dampui atân leh thihpui atân pawh Lal Isua tluka thlanawm khawvêl thilah pakhat mah a awm lo. Lal Isua mi tin tâna Chanchin Ṭha, damna famkim a nih hre lo khawvêl mihring zaa 67 vêl an la awm a. Heng miten an hriat theihna tûra hrilh hi kan bat a ni e.