MAHNI INNGAIHLU

MATTHAIA 23:12
Tu pawh inngaihlu apiang an tlâwm ang a, tu pawh inngaitlâwm apiang chawimawiin an awm ang.

Tlangval pakhat hi lêngchhuak tûrin a insiam a. Nawmsak bâwlna thawmhnaw hrang hrang a inthuam a, a hmaiah te chuan eng eng emaw a hnawih a, tarmit nalh tak a vuah a, a kutah te chuan thîr eng eng emaw a vêt nuai a, rangkachak rawng ṭhi lian tak chu a awrh bawk a. A jeans kekawr ṭet hnuang chu a ha bawk a. Tichuan a bike nên nalh inti takin a lêngchhuak ta a.

Thlasik anih avangin vûr tel deuh thli vâwt tak chuan a hmai a rawn theh ṭhawt ṭhawt ṭhin a. Tlân pah chuan a bike side-glass chu kuai herin amah leh amah inen thei tûrin a siam a, a inhmuh chuan pa a inti êm êm a, nalh a inti hlê bawk. Chutia a bike glass kuai hera mawi ti taka a inen zawk lai chuan kawng ulh deuh a thleng a, a inrin hmain kawng thlangah chuan a tlan liam ta mai a, a tlâkna chu a sâng êm êm a, a dam zo ta lo a, mawi a tih êm êm a nawmsak bâwlna thawmhnaw nen chuan a thi ta a ni.

A tûkah chuan chu tlangval thih dân chu chanchinbu-ah a lang chuai chuai a, chu bâk chu he khawvêlah hmun leh hun a nei ta lo a ni.

Setana hian ropui a duh a, Pathian an a duh a, Pathian nih duhin a dinhmun hial luah a duh a, mahse a hlawhchham chiang hle anih kha. Thihna meipuiah paih thlâk a ni ta zâwk a nih kha. (Isaia 14:12-15, Ezeki.28:12-19)

Chapona chuan min timualpho ṭhin a, min tichhe ṭhin a, min bum a, min tiboral ṭhin. Thufingte 28:26-ah chuan tihian kan hmu, “Mahni rilru ring maitu chu mi â a ni a, Fing taka chetla mi erawh chu chhanchhuah a ni ang.” tiin.

Tumahin kan hma hun kan hre lo a, kan thih hun tûr pawh kan hre lo a ni. Pathian kan hawisan a, amah kan ngaihsak loh a, mahni duhzâwnga hun kan hman chuan chatuan thihna kotlângah kan ding reng tawh a ni tih hriat a ṭha.

Fimkhur takin nun i hmang ang u. “Inring rengin awm rawh u” a tih kha.