BULTUMTU

1 CHRONICLES 21:1-2
Tin, Setanan Israel-te chu a bei a, Davida chu Israel-te chhiar duhna a neihtîr ta a. Tin, Davida chuan Joaba leh a mi liante hnênah, “Kal ula, Beer-seba aṭanga Dan thlengin Israel mite chhiar ula, a zât ka hriat theih nân mi rawn hrilh leh ang che u,” a ti a.

Davida, lal fel tak hian Pathian âw emaw amah ṭihtute âw emaw tal pawh ngaithlain lo zâwm sela chu Israel fate hian hremna nasa tak hi an pumpelh thei ngei ang! Setana’n mihringte suala tlûk tîr hi a tum ber a ni. A châng chuan; min hmangaihtu, kan nu leh pa, unau, nupui pasal, fate pawh hi kawng diklo a min hruai nân hman châng a nei ve ṭhin. Sual ngaihzamna thinlung ‘mi tihdan a ni tho’ tia pawi tih lohna min neihtîr ṭhin.

Kan fimkhur a ṭul hle! Tunlai dân nia kan ngaihte hi Setana thlêmna a lo ni reng thei a ni tih kan hriat thar a ṭul. Isua ngei pawh kha amah hmangaihtu, Petera hmangin Setana’n a rawn thlêm kha! A bultumtu Setana hi kan do tûr a ni, hmanruaa a hmante chu zilhhauvin kan hmangaih zâwk tûr a ni.

LALPA, Setana’n mi a bum tumna hrethiam thei tûrin min pui ang che. Amen.