THUT

THUFINGTE 6:12-15
Mi tlâktlai lo, mi khawlo chu, Ṭawng chaltlai nên a vâk vêl a; A mit a siai a, a kein thu a sawi a, A kutzungṭangin a zaizir ṭhîn. A thinlungah luhlulna a awm a, thil sual a suangtuah reng a, Inrem lohna a tuh ṭhîn. Chuvângin, a chhiatna a lo thleng thut ang a, Vawilehkhatah tihchhiatin a awm ang a, tihṭhat leh theih tawh lohvin.

Thang kamtuin thang a kam chuan a man duh takte an awh theihna tûrin an ei duh zâwng tak chaw chah a siam ṭhin a. An thil duh tak avâng chuan thil dang an ngaihtuah chang tawh ṭhin lo va, thangah an âwk thut ṭhin a, chu chu a hun lova an thih chhan a ni fo.

Setana hian a thanga kan awh a, a hun hmaa kan thih thut theihna tûrin zû te, drugs te, sum te leh sex te mi tam tak hmaah a chah ṭhin a. Chûngte hmang chuan mi tam tak nunna a lâksak thut ṭhin. Hmân aṭanga vawiin thlenga Setana’n mihring nunna a lâksak nâna a chah a hman ṭangkai ber chu zû hi a ni a, hemi hmang hian tam tak nunna a la thut ṭhin. Setana thanga âwk thut lo tûrin Lal Isua tarmit i bun ang u.