INNGAIHSAK-1

1 PETERA 5:7
Anin a ngaihsak ṭhin che u avângin, in manganna zawng zawng ama chungah nghat vek rawh u.

Pathian hi a mite min ngaihsak ṭhintu a ni a. Chuvangin, kan mihringpuite ngaihsak ve hi kan tih tûr a ni. Fran Ferder-a chuan, “Mi, an hlutna lai kan hmuhsak a, kan ngaih pawimawh hian kan ngaihsak a ni,” a ti. Ram a changkâng tawlh tawlh a, ṭul kan inti tawlh tawlh a; mi dang chu thuhran, mahni chhûngte ngei pawh kan inngaihsak ta lo lu deuh em aw?

Tute pawhin chhiatni ṭhatni kan nei vek a, tu chhûngkua mah mahnia mawi taka intuamhlâwm thei kan awm lo. Inmamawh tawn vek kan ni. Dale Carnegie-a chuan, “Mi dangte inngaihsaktîr dân ṭha ber chu anmahni ngaihsak hmasak hi a ni. Mi rêng rêng hian anmahni ngaihsak ṭhintute hi an chhâng let lo thei lo,” a ti. Inngaihsak hi damdawi ṭha tak a ni a, kristian chhûngkua aṭanga bul kan ṭan thar leh hi a ṭul ta khawp mai.