THUPHA KAN CHAWI CHUAN

1 JOHANA 1:9
Kan sualte thupha kan chawi chuan, kan sualte ngaidam tûr leh kan fel lohna zawng zawng tlêng fai tûrin, amah chu a rinawmin a fel a ni.

Mi tam tak chu thil kan tihsualin a rûkin pawi kan ti ve satliah ringawt a, ngaihdam dîl kan tum ṭhin lo. Ngaihdam kan nih theih nân thupha kan châwi a ngai. Thupha châwi tih hian pawi tiha ngaihdam dîl a kâwk lo va, simna a phût tel. ‘LALPA ka sual’ ti mai lovin LALPA laka kan tihsual kha chiang taka malmanin ngaihdam dîlin kan sim tûr a ni. Thil tisual ngai lo kan awm si lo va, tu pawh thupha châwi ngai, ngaihdam ngai kan ni vek mai hlawm si a.

Lal Davida pawh zawlnei Nathanan a dik lohna a hrilhin zêp bo, phat mar leh thup bo tum mai lovin a sual puangin ngaihdam a dîl a, ngaihdamin a awm ta a ni. Lal Davidan a sual zêp lova ngaihdam a dîl ang hian keini pawhin kan tihsualte puangin ngaihdam i dîl ang u. Thil ti sual rau rauah Lalpa hnêna kîrna châng hriate hi an nihlawh. Inchhîra simte a ngaidam duh êm êm a ni.

Mahse, ka LALPA hmangaihna ropui chuan,
Mi sual sim a ngaidam;
Simin ka lo kał e, aw LALPA, (2)
Ka sualna ngaidam rawh.

LALPA, ka chapona sual thupha châwiin ngaihdam ka rawn dîl e.