KAN SUALTE MIN NGAIDAM ANG CHE

LUKA 11:4
Kan sualte min ngaidam ang che, Keini pawhin kan englo bâte zawng zawng kan ngaidam ṭhîn a ni. Thlêmnaah min hruai lût suh ang che,’” a ti a.

Lukan, “Kan sualte min ngaidam ang che,” tia a ziak laiin Matthaia chuan, “Kan batte hi min ngaidam ang che,” a ti ve thung a. Helai thu hi kan hman dân tak chu, “Kan chunga thil tisualtute kan ngaidam angin, nang pawhin kan thil tihsual ngaidam ang che,” tih a ni.

Lal Isua hian mi dangte ngaihdam duhna rilru pu chunga Pathian hnênah kan sualte ngaidam tûra kan ṭawngṭai a duh niin a lang. Paula chuan, “Pathianin Kristaah a ngaidam che u ang hian, inngaidam tawn rawh u,” tiin min hrilh ve bawk. Ngaihdamna hi mihring nunhonaah a pawimawh êm avângin zirtîr âwm tak Lal Isua hian min lo zirtîr a ni. Amah khêngbettute tân pawh ngaidam tûrin a Pa hnênah a dîl a. Ani chuan thua min zirtîr a takin a nunpui thei a, he ṭawngṭaina mawi tak hi kan la hman zêl dâwn avângin kan chunga thil tisualte ngaidam ve tûra kan inhuam pawh a pawimawh hlê âwm e.