PATHIAN A AWM

EXODUS 3:14
Tin, Pathianin Mosia hnênah chuan, “Nangin Israela thlahte hnênah chuan, ‘AWMA chuan in hnênah mi rawn tîr a ni e,’ i ti tûr a ni,” a ti a.

Thiamna leh finna lamah sâng tual tuala kan inhriat lai hian Beginner zir âwm lek kan inzirtîr thar a ṭûl leh ta! Kan Mizo unaute zîngah ngei pawh Pathian awm rin lohna (Atheism)-in bu a rawn khuar ve ṭan ta a! Hetiang khawvêlah kan unau ṭhenkhatte an chên tâk avângin Pathian awm ngei thute hi kan sawi tam deuh deuh a ṭûl ta hle mai.

Pathianin Israel fate hruai chhuak tûra Mosia a koh ṭuma Mosia nêna an inbiaknaah khân, “AWMA KA NI,” tiin a inhriattîr a. Hei hian Pathian a awm chianzia a târ lang chiang hle. Aigupta rama Pathian thilmak tih te, Tuipui sen a kântir dân te, hmêlma a hnehsak dân te, chaw leh tui a pêk dân te, Jordan lui a kântir dân te, ram tiam Kanaan an luh hnu thlenga a hruai dânah te pawh khân Pathian a awmzia a lang chiang a. Thuthlung Hluia a mite a enkawl dân zawng zawng aṭang pawhin Pathian hi a awm a ni tih a chiang êm êm a ni.