THLÂN VÊNGTUTE THUSAWI

MATTHAIA 28:11-13
Tin, an va kal lai chuan vêngtu sipai ṭhenkhat chu khawpuiah an va lût a, thil awmzia zawng zawng chu puithiam lalte hnênah an va hrilh a. Tin, upate nên an inkhâwma, an inrâwn zawhin sipaite hnênah chuan tangka tam tak an pe a, ‘Zânah, kan muthilh hlânin a zirtîrte an lo kal a, amah chu an ru ta a ni,’ ti ang che u.

Mari Magdalini leh Mari dang chu ni sarih ni hmasa ber tûra khua a vâr dâwnin thlân en tûrin an kal a, lîr nasa tak a lo nghîng a; LALPA vântirhkoh vân ata a lo chhuk a, lung chu a rawn lum sawn a. A hmêl awmzia chu kâwlphe ang a ni a, a silhfen chu vûr angin a vâr a. Thlân vêngtu sipaite chu an hlauh avângin an khûr a, mitthi ang maiin an lo awm ta a. Mari Magdalini te hnênah Isua a thawh leh thu a lo hrilh a.

Sipai ṭhenkhatte chu puithiam lalten pawisa tam tak an pe a, pawisa avângin dâwt sawi an hreh lo. Keini pawh sum ît avângin thil dik lo kan ti em? I inenfiah ṭheuh ang u (Heb 9:27).

Kristian, ṭawngṭai fo rawh, thlêmtu a hnai,
Lalpan a koh che chu theihnghilh suh la;
I Chhandamtu hnênah i ṭawngṭai chuan,
Thlêmna tinah him takin i kal ang.

Tangka sum ngainat hi sual tinreng bul a ni.