ENG ANG TAKSA PUIN NGE?

1 KORINTH 15:42b-43
Ṭawih theia tuhin a awm a; ṭawih thei lova kaihthawhin a awm; chawimawi lohva tuhin a awm a, ropui taka kaihthawhin a awm; chak lova tuhin a awm a, thiltihtheihna neia kaihthawhin a awm.

Saddukaiten Mosia lehkhabute (Torah) la urhsun viau mah se, mithi thawhlehna an hnâwl fithla ṭhak a (Mk 12:18). Pharisaite erawh chuan taksa thawhlehna an rin mai bâkah chatuan atân rorêlna lo awm an ring bawk.

Thlai chi kan tuh leh a lo ṭiak chhuak inzawmna nei mah se, an inang lo. Vân taksa leh lei taksa a awm a, Tho leh taksa pawh kan mamawh ang tak min pe mai ang. Kan lei taksa chu ṭawih thei a nih avângin phûm nimah se, ṭawih thei lova kaih thawh a ni ang a. Hmuhsitawm tak kha phûm a ni a, ropui taka kaih thawhin a awm, chak lo tak kha phûm a ni a, thiltithei taka kaihthawh a ni ang. Mihring lam taksa kha phûm a ni a, kaih thawh a awm tûr chu thlarau lam taksa a ni. Thlarau taksa kan neih tûr chu a thi tawh dâwn lo a ni (Jn 6:40; 11:25-26).

Lei taksa ropuina a dang,
Vân taksa ropuina a dang;
Lei taksa zawng boral mai tûr,
Vân taksa chu a ropui zual zêl ang.

Krista hnênah kaihthawhin i awm em?